體力活動金字塔

食物有金字塔，做運動都有金字塔。好多朋友成日話自己未老先衰，跑幾步追巴士就氣喘，是否應該「的起心肝」做吓運動？

衞生署最近出咗本書，教人保護膝頭關節，書名叫做《護膝防痛齊開步》，書入面有個四層體力活動金字塔，教大家應該做咩運動。













金字塔最底一層運動應該日日做，又最易做嘅運動，好似散步同做家務，唔好睇小做家務，平時掃地、洗碗、抹窗等，都可以幫助舒展筋骨。

第二層就係一啲對心肺功能略有要求嘅耐力訓練，例如游水、踩單車、緩步跑同網球等。

第三層就係每個禮拜只可以做兩、三次的肌肉力量訓練，例如去健身室做伸展運動、跳社交舞、或者打吓高爾夫球等。

塔頂的活動就應該最少做，千祈唔好呆坐咁多，以免令膝關節提早老化。