垃圾睡眠特別易肥

成日聽人講垃圾食物，原來訓覺都有「垃圾睡眠」。

依家經濟唔好，很多時打工仔為份工要犧牲訓覺時間，公司ＯＴ完，仲要攞埋文件返屋企做，工作到最後一刻先跳上床，帶埋一大堆工作壓力去搵周公，點可能會有覺好訓？在床上輾轉反側，不斷扎醒，就算一晚訓足八個鐘，起身時都會好似未訓過，完全無精神做事，呢種就係質素極差的垃圾睡眠。

成日唔夠訓，其實對健康好大影響，年輕人唔好以為訓少兩粒鐘好閒，隨時未老先衰。近年好多研究都發現習慣垃圾睡眠的人特別容易肥，就算無增加食量，體重都會節節上升，肚腩越來越大，皆因長期透支，好易會影響到賀爾蒙分泌失調，新陳代謝減慢等等，令身體脂肪有機可成。

除體重激增之外，垃圾睡眠仲可以造成好多後遺症，好似記憶力衰退、反應遲鈍、分析力下降，嚴重影響工作表現。做事慢，自然要用多啲時間，結果又再訓少啲，簡直係惡性循環。唔夠訓更會影響儀容，除了大家都好熟悉的黑眼圈外，更會導致習慣性脫髮，梳頭時甩多很多頭髮，就係訓得差的警號。

工作壓力人人有，識得點樣減壓至緊要。不妨訓覺前一、兩個鐘唔好再睇文件或用電腦，畀個腦冷靜下，聽下柔和音樂，最緊要係定時定候訓覺。工作真係太多的話，提早一、兩個鐘起身做，總好過成日捱更抵夜，食咩都補唔番啦！